Vishon i Mishon

Vishon i Mishon

Muchanan na Boneiru ta lanta den un ambiente multilingual. Pa mayoria alumno, papiamentu ta nan idioma materno, miéntras ku na skol nan ta haña lès na hulandes. Debí na migrashon, tambe tin oumento di kantidat di alumnonan ku otro base di idioma ku mester siña tantu papiamentu komo hulandes. Alumnonan hulandes ta konfrontá un reto si nan ke siña papiamentu. Ademas,  por skucha e idioma ingles mas i mas den kurá di skol, i alumnonan ta aktivamente enbolbí ku vários idioma via medionan sosial. Pues kasi tur alumno ta trata ku múltiple idioma den nan bida diario. Brinda bon edukashon den e konteksto akí no ta un tarea fásil. Maestronan ta hasi nan bèst pa akomodá tur alumno pero tin biaha nan no tin e konosementu i e rekursonan nesesario. Tin mester di un aserkamentu strukturá riba e área di multilingwismo pa sostené tantu dosentenan komo alumnonan.

E situashon úniko akí na Boneiru ta boga pa un maneho di idioma spesífiko i inovashon den enseñansa. Den e proyekto di Inclusief Taalonderwijs Bonaire (iTOB), ta pone enfoke prinsipal riba e kreashon di un ambiente di idioma inklusivo. Kaminda ku ántes tabata duna tiki òf ningun atenshon na e idioma materno di e alumnonan ora di siña hulandes, iTOB ke konstruí un brùg for di henter e repertorio di idioma di un alumno pa e idioma meta. Ta usa di un manera stratégiko e konosementu amplio ku e alumnonan tin di nan idioma materno i di otro idioma pa atkirí e idiomanan meta i konosementu.

Pa medio di e proyekto akí, nos ta sòru pa idiomanan reforsá otro en bes di remplasá otro. Nos ta prepará skolnan i maestronan pa atendé ku multilingwismo na skol i den klas na un manera struktural. Esaki no ta konta solamente pa hulandes komo idioma meta pero tambe pa otro idiomanan meta na skol, manera papiamentu i ingles. Ademas, nos ta trahando riba un aktitut di kambio pa ku edukashon di idioma. Huntu ku e skolnan, nos ta aspirá pa un kambio di un aserkamentu tékniko di enseñansa di idioma, pa un método interaktivo ku ta mará na un aserkamentu aktual. Tambe nos ta trahando pa krea un ambiente na skol den kua ta aseptá i balorá tur idioma. E meta di iTOB ta pa utilisá multilingualismo den enseñansa huntu ku e skolnan, ku bista riba e éksito akadémiko di e alumnonan.

Finalmente, kolaborashon ku e otro islanan di Karibe Hulandes ta forma un pilar importante den e trayekto akí. Ya komo ku e kontekstonan edukativo multilingual di Aruba, Boneiru, i Kòrsou ta similar, kompartiendo konosementu i ‘good practices’ ku otro lo fortalesé e trayekto akí.